Pask lowen dhywgh hwi oll! Splann yw an gewer omma yn Kernow an bennseythen ma, howlyek ha tomm. Yma lies havyas (Paskyas?) omma owth omlowenhe agan trethow ytho pur vysi yw an fordhow. Kales yw ragon lewya yn Kernow pan yma havysi drefen an fordhow dhe vos byghan. Da yw gans an mayn fordhow meur gwellhe an fordhow yn gwav, heb lies havyas, ytho yma kudynnow dhyn dres oll an vledhen.

Fatel wra gwellhe an kudyn ragon, an Gernowyon? Ny wonn vy, my a assay avoydya lewya yn hav may hylliv avoydya an dharomdagow mes nyns yw possybyl pub dydh.

An seythen ma my a woslowas orth ilow splann yn penneglos Truru. Yth esa Passhyon Sen Jowan skrifys gans J. S. Bach ha kanas gans an ganoryon Sen Varia, ha lies servis kanas gans keur an benneglos aga honan, pur dha yns i. Gwynn agan bys kavos keur mar dha hag a-vri.

Yth esov vy ow studhya rag ow apposyansow peswora gradh yn pols ma. Res yw dhyn redya lien kernewek (kresosel hag arnowydh), dyski fatel wra konvedhes henwyn tylleryow, dyski gramer kernewek heb mar ha dyski istori agan yeth. Drefen my dhe vos yn dygolyow skol an diw seythen ma, my a assay dasweles ow hernewek rag dew our pub dydh.

My a woslow orth neppeth pub dydh rag gwelhe ow sleyghneth, ha my a wra pymthek mynysen dhe ramer ynwedh war “Quizlet” – y hallav dewis py verbow ha py amser. Wosa henna my a red po lien po istori. Mar mynni dyski yethow gwell yw genes studhya pub dydh rag pymp mynysen ages unweyth pub seythen. Es yw ankevi gervow!

Rag pub studhyer kernewek kales yw an yeth. Rag lies tus kalessa yw an dehwelans dhe studhya, martesen wosa lies bledhen, mes ni a weres agan yeth dhe devi.

Yma dew gerdh a vri yn Kernow – an kerdh oll a-dro agan avror, an “South west coast path,” ha’n kerdh diworth po war-tu Penn an las. Rag lies den yn Breten Veur yma’n towl dhe gerdhes diworth John O’Groats yn Alban gogleth war-tu Penn an las rag aluseneth. Da yw gans tus aral kerdhes a-hys an arvor dhe Gernow – ha Dewnans ynwedh. I a yll assaya y wul war-barth, po kerdhes tamm a tamm pub hav.

Mes nyns yw es, kerdhes yn Kernow drefen bos lies bre. An hyns a-dro an arvor a a-nans ha yn-sol pub mildir ha hir yw agan arvor, mes ni a’gan beus gwelyow pur deg pub mildir ynwedh. Yma eghen dhe dirwel dhyn ytho agan kerdhow yw meurgerys gans tus kernewek ha sowsnek. Gwell yw genev an gwel diworth Porth Ia war-tu Porthperan ha Towan Pleustri gans an golowji y’n pleg-mor. Y fydh an gwella gwel yn Kernow rag oll ow bewnans.

Ottomma hwedhel berr, my a’n skrifas wosa redya “The Mousehole Cat”:

Mowser ha’n morviles

Ha Mowser ow hunrosa, an gath hager-awel veur a wre kewsel dhodho.

“Yma lies morvil y’n pleg mor, ynter an arvor ha’n enys. I a wra merwel pan yma’n trig!” yn-medh hi.

Mowser a dhifunas. Res o dhodho gwarnya Tom. Fatel wra y wul?

“Miaow!” yn-medh Mowser pan welas ev Tom. “Miaow!”

Mowser a bonyas yn-bann an grisyow. “Miaow!”

Gwynn y bys Tom a’n holyas. Mowser a lammas dhe’n fenester y’n penn an chi. Tom a gemeras with.

“Pyth yw henna y’n mor Mowser?” yn-medh ev. “Morviles yw… mes ny yllons triga ena, an trig a wra dos yn skon!”

Tom eth dhe’n porth.

“Pyskadoryon! A yllowgh ow weres?”

An kokow eth y’n pleg mor gansa ha wor’tiwedh peub morvil esa yn dowr down. Ha Mowser? Yth esa ev war kok Tom ow golyas. Distowgh, ev a welas lost kath hager-awel veur y’n ebron.

“Gwrys yn ta Mowser!” yn-medh hi.

An bennseythen eus passys my eth dhe guntelles a-dro fatel wra gwelhe an lok dhe Gernewek warlinen. Wosa an guntelles my a erviras dalleth skrifa an blog ma, rag gwelhe ow hernewek yn sur, mes dhe worra kernewek warlinen ynwedh. Kales yw rag dallethoryon ow tyski agan yeth dhe gavos kedhlow dhe les warlinen, y hyllyn ni hwithra ‘kernewek’ mes yma lies gwiasva ha mars vo dallether ha ny wodhvo pyth yw an dyffransow ynter FSS, po kemmym, po kernewek unys pur gemyskys bo.

Orth ow brys, my a dyb yma edhom dhe’n gemeneth kernewek dhe weres pynag oll a vynn dyski an yeth. Es yw hwithra warlinen, ha mars vo nebonan ow mynnes dyski agan yeth, y hwrellons hwithra warlinen yn kynsa le rag kedhlow. Res yw dhyn gul gwiasvaow kler ha styrya pyth yw an dyffransow ha’n eghennow dhe Gernewek. Dhe les a vydh an kedhlow ma rag pub esel dhe’n gemeneth kernewek. Yma dyffransow ynter an lythereniethow mes martesen y hyllyn ni aga solempnya.

My a vynsa gwelhe ow hernewek, ytho my a erviras skrifa “blog” yn kernewek! My a wra assaya y skrifa pub seythen. Yma govenek dhymm hwi a wra y gavos dhe les po didheurek.

Nyhewer my eth dhe geskan yn benneglos Truru. Yth esa kowethas “choral” Truru ow kana Passhyon Sen Luk, martesen skrifas gans J. S. Bach. Yth esa nebes koweth dhymm ow performya. An hwedhel yw an keth ha agan Passhyon agan Arlodh heb mar. Passhyon Sen Luk a dhalleth gans an Pask ha ev a worfen pan Yosep henwys a Baramat a gemmer korf Yesus. Nag yw keniver manylyon dell Passhyon agan Arlodh, mes skrifas a veu ev y’n seytegves kansvledhen, ytho an tus a allas redya an Bibel aga honan, yn aga mammyeth, nyns esa edhom dhe dhyski an tus gans an Passhyon ma.

Unn hwedhel, dew vaner rag y leverel. Mes yma messaj didheurek ragon, gans bardhonieth po ilow hwedhel a dheu ha bos moy hegov.